Эндзі Фарэл, былы капітан зборнай Ангельшчыны і ўладальнік тытулу лепшага рэгбіста сьвету 2004 году (у вэрсыі рэгбі-ліг), абвясьціў аб намеры завяршыць кар’еру па завяршэньні бягучага сэзону, паведамляе BBC. Фарэл плянуе ў будучым працаваць адным з трэнераў моладзевай каманды “Сарацынс” з Уотфарда, за якую выступае яго сын Оўэн.

- Я думаю гэтак жа хутка, як і раней, але маё цела ўжо не ў той форме, – растлумачыў чыньнікі свайго рашэньня знакаміты гулец.

Эндзі Фарэл нарадзіўся ў Уігане 30 траўня 1975 году і сваю кар’еру пачаў у мясцовай камандзе, пасьля стаўшы ў яе складзе самым маладым гульцом у гісторыі, якія выйграў пяць чэмпіянатаў і чатыры Кубка Выкліку. Ён выступаў за Вялікабрытанію ў рэгбі-ліг у якасьці блукаючага форварду (loose forward), а таксама ўзначальваў каманду да пераходу ў рэгбі-юніён у 2005 годзе. 28 верасьня 2007 ён зьдзейсьніў сваю першы трай за каманду Ангельшчыны ў матчы рэгбі-юніён супраць Тонга ў групавым матчы Кубка сьвету па рэгбі.