Пры цяперашняй сістэме розыгрышу 20 камандаў спаборнічаюць на працягу месяца на тэрыторыі краіны (або краін), якая арганізуе турнір. У турніры дзьве стадыі — групавая і гульні на выбываньне. Удзельнікі дзеляцца на чатыры групы па пяць краінаў у кожнай, званыя A–D. Каманды, якія занялі першыя чатыры месцы на папярэднім Кубку, разьмяркоўваюцца адпаведна па групах ад A да D. Астатнія чатыры каманды, якія аўтаматычна атрымалі права на ўдзел у турніры, разьмяркоўваюцца па розных групах выпадковым чынам.

Астатнія пазыцыі ў кожнай групе запаўняюцца застаўшыміся ўдзельнікамі. Кожная каманда праводзіць чатыры матчы, па адным з кожным супернікам з сваёй групы. За перамогу налічаецца чатыры ачкі, за нічыю — два. Адно прызавое ачко налічаецца за прызямленне чатырох або больш спроб у адным матчы, а таксама за паразу з розніцай ня больш чым ў сем ачкоў. Месцы каманд у групе вызначаюцца па агульнай колькасці набраных ачкоў. Першыя дзьве каманды з кожнай групы прымаюць удзел у гульнях навылёт. Гэтая стадыя складаецца з чвэрцьфіналаў, паўфіналаў і фіналу. У чвэрцьфіналах каманда, якая была першай у групе, гуляе з камандай, якая заняла другое месца ў іншай групе. Пераможцы чвэрцьфіналаў выходзяць у паўфінал, а пераможцы паўфіналаў — у фінал. Каманды, якія прайгралі ў паўфіналах, прымаюць удзел у матчы за трэцяе месца.